澄澄故事台-兩週年答謝文章
[2019/03/16 Beta Version 0.1-澄澄故事台網站正式公開]
-
一個折磨自己嘅活動,由發佈網站嘅呢一刻開始,唔經唔覺就已經兩年。
-
我仲記得故事台第一篇文係攞返之前喺自己私人Instagram無聊寫嘅短文,之後就開咗《#106與她的邂逅》呢個合作文,接住就係人生第一個短篇作品《#明戀暗愛補習社》,之後都寫咗唔同嘅短篇、散文之類嘅嘢,到而家最新嘅《#前度超渡師》。
-
話咁快,澄澄故事台已經寫咗二十萬字,紙言、TBC、Penana等嘅網絡小說平台已經累積咗四萬嘅點擊次數,對於一個文筆唔係好好嘅小弟已經係一個奇跡,自己都估唔到自己嘅故事係咁多人睇嘅。當然除咗點擊率之外,唔同嘅故事亦都上咗唔同嘅榜,例如紙言嘅單日熱門榜、TBC人人故事榜,呢啲都係推進寫文嘅進度,實在有賴各位讀者大大力支持。
-
由上年開始,澄澄故事台可以話係無間斷咁寫文、出文,眾所周知嘅逢星期三同星期日,老實講,作為一個寫文初哥嚟講,日日都要寫文的確係好辛苦,但見到有讀者dm同埋留言支持我嘅創作,我已經覺得咁樣寫文係值得嘅!
-
曾經有人話,創作要靈感先寫到,但其實好多靈感都係喺你生活中嘅瑣碎事得到,又或者睇多啲書,都可以有唔同嘅靈感。我成日都用「屙屎」比喻寫文,你食啲咩,就屙返啲咩,所謂你食啲咩就係你平時睇書嘅類型,文學類好似食菜咁,唔好食但健康,即係好悶但對自己啲寫作技巧好,網絡小說同漫畫彷彿係零食咁,好食但唔健康,即係好睇但對作文冇益。話雖如此,淨係食菜都唔代表健康㗎!乜都睇先可以提高自己嘅寫作水平㗎!
-
至於你可能會問,點解啲文唔用白話文撰寫?可以推去香港以外嘅地方,其實故事台一直都係用粵文為主要書寫語言,第一就係要捍衛香港獨有嘅粵文文化,第二就係用粵文寫,大家可以容易啲睇,用自己講開嘅文字閱讀,舒服啲。
-
捍衛粵文嘅同時,我都堅持寫正字,正所謂「正字是個好東西」,所以故事台啲文堅決唔用簡體字、5P字,就係唔想用一個錯嘅字誤導讀者,唔想大家睇完我啲文之後用咗一個錯嘅字。捍衛一種語言,其文字都係要捍衛㗎!
------
睇開嘅老觀眾都知道,澄澄故事台除咗我之外,仲有幾位編輯,包括 @rachellwriting、@hihi__public @fish.thunder、@_.heyatt ,話說之前叫咗佢哋寫幾隻字介紹自己,點知最後收到嘅回覆淨係得個懶字,所以就冇佢哋嘅自我介紹喇!咁呢四位編輯究竟係負責啲咩呢?
-
首先係 @rachellwriting ,佢就係澄澄故事台嘅開國功臣,亦都係文字編輯,如果大家有睇上年嘅答謝文都應該對佢唔陌生㗎喇,佢嘅職責就係捉我啲錯字,寫下啲短篇文章,得閒又搞啲惡搞澄澄故事台嘅meme圖。
-
至於第二位就係 @hihi__public ,佢都係文字編輯之一,我可以好肯定咁話,佢係幫故事台幫得最多手嘅,由上年七月開始係咁執我啲文,幫我改下啲語句不通嘅句子,執下啲錯字。故事台去到而家都保持到一個低錯字率,HiHi實在幫咗我唔少,雖然佢平時學業都好繁忙,但都不辭勞苦咁幫我做文字校對,大家可以支持佢同我一齊寫嘅《#澄叔與HiHi的回憶錄》㗎!
-
去到第三位就係 @fish.thunder ,佢係故事台嘅美術編輯,負責設計故事封面,當中有《#霹啪文壇頒獎典禮》、《#如若我是》,之後或許有佢作品透過澄澄故事台發佈,大家都可以follow佢嘅Instagram,督促下佢畫畫,我自己都想有佢嘅作品可以喺呢度po,大家快啲follow下啦!
-
而最後一個要介紹嘅就係我老死 @_.heyatt ,呢位仁兄佢亦都係美術編輯,同時係《#夾出一個她》嘅男配角,點解佢會喺故事入面出現,就係因為同佢去camp而有故事嘅靈感,激發到我寫故事大綱,所以呢個故事嘅出現,佢都有個舉足輕重嘅地位,同埋呢個故事嘅封面更加係出自佢手筆嘅,所以就開一個角色答謝佢喇!
------
《夾出一個她》都喺前幾日正式完結。同時而喺上年嘅同一日,我叫大家多多支持當時嘅新故事《夾出一個她》,今年同樣都要叫大家支持新故事,而呢個故事當然係《前度超渡師》啦!
-
故事台今年嘅目標,就是時代再幾黑暗,我希望用睇文嗰幾分鐘,令大家輕鬆一下,唔好成日咁緊。
-
「壞時代,帶來一點歡樂!」
-
我喺到應承大家,連載故事,一定會繼續連載,但可能因為學業繁忙嘅關係而改一週一篇,到時再睇情況通知大家;全新嘅散文一定有,而家籌備緊,頭兩集嘅題目都已經諗掂;而之前同大家分享嘅改歌詞計劃,已經改咗大約三份一,今年內一定會上架嘅。大家放心,應承咗大家嘅嘢一定會做。
-
最後真係真係多謝一直以嚟支持嘅讀者,睇完故事之後不妨畀個like支持我,同埋請大家多多支持澄澄故事台。
-
澄澄上
2021/03/16
-
(1885字)
發佈日期:2021/03/16