澄澄故事台-合作夥伴「獅傅」
如果你有幸睇到呢個post,證明我已經唔喺人間,請大家幫我like同埋share呢個post。想知咩事,睇埋落去啦!
-
某日,正當我喺街上面食緊獅傅牌布丁時,突然有隻手拉咗我入後巷。
-
我:「咦!乜咁啱吖鯨魚,又會撞到你嘅。」
-
鯨魚:「我而家有撞你咩?我想你幫我一個忙,好簡單啫,寫篇文介紹我啲漫畫。」
-
我:「有咩著數先?」
-
鯨魚:「你夠膽同我講著數?大膽。」
-
鯨魚喺佢個胃嗰度攞出一把祖傳生果刀。當時呢把刀離我嘅喉嚨只有零點零一公分,四分之一炷香之後嗰把劍嘅女主人將會徹底咁愛上我……篇文。因為我決定講一個大話。雖然本人生平講咗無數咁多個嘅大話,但是呢一個,我認為是最完美嘅。
-
我:「得得得,你要乜都得,圖片係你嘅,連文字都俾埋你。總之乜都俾晒你。我聽日一定俾到篇文你。」
-
終於安全咁返到屋企,我沖咗個靚涼,或許呢次係我人生最後一次嘅沖涼。我知道有啲嘢,呃得一時但呃唔到一世,但我真係諗唔到寫咩,我都冇辦法㗎!於是我去咗Google「如何解決難題」。Google竟然答「解決提出難題嗰個就得㗎喇」。嘩!乜而家Google咁提倡暴力嘅,暴力係解決唔到問題㗎。
-
我左諗右諗都係諗唔到,我決定打俾我老死-象夫。
-
我:「SOS SOS,我俾鯨魚挾持緊,要我寫篇文介紹佢,點算?」
-
象夫:「乜你咁笨㗎,又會聽佢條茂利講嘅。」
-
我:「佢揸住祖傳生果刀指住我,走唔甩。唉!」
-
象夫:「大鑊,祖傳生果刀好危險㗎。兄弟,執行operation A」
-
我:「咩係operation A?」
-
象夫:「你唔好問,你唔好理。第時你會知㗎喇。」
------
(第二日)
-
我:「嗱!我要介紹一條粉腸叫獅傅,佢係畫畫嘅,好好睇。」
-
鯨魚:「太無聊,重做。」
-
我:「嗱!今日我要介紹賤人叫獅傅,佢係畫漫畫嘅,咁主角叫獅傅,配角叫象夫。」
-
鯨魚:「太hard sell,重做。」
-
我:「今次要介紹一位畫家叫獅傅,佢啲彩蛋既好睇又好笑,仲好好食㖭 !」
-
鯨魚:「你係咪玩嘢啊,俾咗一晚時間你,你諗埋啲咁嘅垃圾。我俾多兩分鐘你,你諗唔到就同呢個地球講bye bye。」
-
呢個時候,我終於知道大鑊臨頭,望住鯨魚手上把祖傳生果刀,我額頭滴咗一粒汗,睇嚟我壓力真係好大。我真係諗唔到點介紹啊!
-
鯨魚:「最後十秒、九、八、七、六....」
-
我:「咪住,我諗到喇」
-
我:「今次我要介紹一個靚女畫家叫獅傅,佢心地善良,畫嘅畫仲好靚㖭!嘩頂綠帽邊個戴緊?畫得好似喎!嘩!個布丁畫得咁似,我驚唔小心食咗佢喎!杯咖啡畫得靚過杯真咖啡,靚到你呢!咁畫法肯定好快出書,一定吸引到唔少人去睇啊。」
-
鯨魚:「澄澄你好叻吖!寫中我心聲啊!係呢,你點知我諗咩㗎?」
-
我:「我都唔知㗎,我估㗎咋。」
-
鯨魚:「呢度冇你嘅事,你可以返屋企繼續做諗樣喇!」
------
我:「掂喎!象夫,呢招掂喎!呢招叫咩名堂?」
-
象夫:「呢招就係叫operation A,又叫「讚讚讚」,你係咁9讚佢就得㗎喇。」
-
我:「任務完成,可以鬆一口氣,Del返個post、飲杯咖啡先。咪住,點解我feel到後面有道殺氣,而且條頸涼浸浸嘅?」
-
「啊~」
------
小劇場去到呢度,認真介紹喇。咁今次係想介紹我嘅朋友-獅傅,識咗佢咁多年做事都係3分鐘熱度。上個月突然雄心壯志,想開個IG account畫畫,又問我點整網站。身為損友嘅我就梗係「全力支持」啦,雖然個網站仲未有雛型,但我「估計」應該唔錯嘅。
-
最後唔該大家去follow下佢,佢啲畫真係好靚,喺每一幅畫當中,帶係出一個主題,屬於獅傅嘅頹廢、屬於鯨魚嘅慵懶。
-
PS,喺獅傅嘅story到會見到我嘅彩蛋,想知係咩?自己去follow、自己去睇啦。
(1438字)
發佈日期:2020/04/10
發佈日期:2020/04/10